هتكلم معاكم النهاردة في موضوع مهم وبالعامية كده عشان معظم الناس تفهم مضمون الموضوع واللي محتاج اوصله ليكم بالظبط .
نظام الصيام المتقطع
نظام الصيام المتقطع هو نظام ممتاز لخسارة الوزن والدهون اللي في الجسم ومن انواع الدايت اللي هتلاحظ الفرق بتاعها بسرعة كبيرة لو طبقتها صح
ماهو نظام الصيام المتقطع
مبدأيا النظام المتقطع معناه انك هتصوم 16 ساعة في اليوم وتقسم اكلك وجباتك علي ال8 ساعات الباقيين
ال16 ساعة دول محسوب منهم نومك وكمان متاح ليك فيهم تشرب ميا براحتك واي مشروبات ساخنة بس بدون اضافة سكر
مش شرط المدة تكون 16-8 بس دي الفترة القياسية للنظام ولو تقدر علي 20-4 يبقي عظيم
دايت الصيام المتقطع
طيب ازاي بخس او بخسر وزني في نظام الصيام المتقطع ؟
ببساطة شديدة جسمك بيتعمد علي مصدرين اتنين للطاقة وهي الكربوهيدرات والدهون اللي في جسمك ، لما ميكونش فيه كاربوهيدرات الجسم بيبتدي يستخدم دهونك كمصدر طاقة وده مبيحصلش غير في فترة الصيام فالجسم بيتغذي علي الدهون
وعلي فكرة انت في جسمك دهون اضعاف اضعاف السعرات الحرارية اللي بتحصلها في اليوم الواحد
بس الفكرة انك طول الوقت مبتستخدمش المصدر ده لأنك طول اليوم بتاكل وطول ما الجسم بيلاقي اكل بيستخدم مصدر الطاقة الأول وهو الكربوهيدرات فمبيلاقيش فرصة يحرق دهون غير وهو نايم
فبالنسبالك كشخص بتاكل علي مدار يومك اللي بيحصل كالأتي :
جسمك بيحرق من الكاربوهيدرات مش من الدهون لان مفيش فرصة يحرق دهون
كمان بيخزن الكاربوهيدرات الزيادة علي صورة دهون في الجسم وده اللي بيسب زيادة الوزن والدهون في الجسم
فلازم عشان تحرق الدهون دي تبطل تاكل وتصوم في فترة من اليوم.
تجربتي مع الصيام المتقطع
بعد فترة اسبوعين من اتباعي للنظام ده اللي حصل كالأتي :
مبقتش بجوع كتير وبشبع من اقل حاجة
عرفت اروض هرمون الجوع بالبلدي كده وامشيه علي مزاجي مش هو اللي يمشيني
كمان نومي بقي اعمق ومستوي التركيز في اليوم بقي الضعف ومبقتش بفصل في نص اليوم او احتاج انام بالنهار او بعد ما ارجع من الشغل او الجامعة ، بالعكس أنا برجع بيكون عندي طاقة مببقاش عارف استخدمها في ايه!!
بالنسبة بقي للتخسيس وحرق الدهون فهتلاحظ بعد اسبوعين ان فيه فرق فعلا وان انا مكنتش كده قبل اسبوعين
والوزن قل بشكل ملحوظ ولو فيه كرش كبير هتلاحظ الفرق
معلومات علي جنب عن الصيام المتقطع
طالما قولنا ان ال16 ساعة صيام يبقي صيام بجد ماعدا الحاجات اللي اتفقنا عليها وهي المياه وممكن مشروبات ساخنة بس بدون سكر نهائياً .
كمان مينفعش في أي وقت من ال16 ساعة تاخد اي ثمرة فاكهة وتقول مفيدة مع الدايت ، انت كده هتوقف حالة حرق الدهون خالص وهترجع جسمك لحالة الاستهلاك من المصدر الأول
لو حصل وضعفت قدام اي حاجة بسيطة زي الفاكهة او الشيكولاتة مثلا وانت في وضع الصيام حاول تزود ساعة او ساعتين علي ميعاد كسر صيامك
يستحسن تمشي شوية ولو نصف ساعة في اخر 3 ساعات من الصيام هيفرقوا معاك جدا .
حاول تشرب مياه كتير وانت صايم ، اشرب في اليوم ما لايقل عن 2 ونصف لتر.
لو لقيت صعب عليك تصوم 16 ساعة في الأول ابتدي ب 12-12 يعني 12 ساعة مخصصين للأكل و12 ساعة صيام .
تاكل ايه بعد الصيام المتقطع
بص بقي يا معلم مينفعش تقول انا كنت صايم وطول ال8 ساعات تقضيها اكل ونشويات وحلويات بإفتراء كأنك في رمضان (وده اللي بيفسر احنا ليه مبنخسش في رمضان)
ببساطة جدا بعد الصيام لو عاوز توصل لنتايج كويسة لازم تاكل اكل صحي وتقسم اكلك علي وجبتين اتنين فقط ومفيش بينهم اي سناكس نهائياً.
الوجبتين كل فيهم نشويات وبروتينات ودهون صحية وزود من البروتينات زي البيض والسمك واللحمة والجبنة والتونة
بس تاكل بذكاء ومتعديش حدود سعراتك الحرارية اللي جسمك محتاجها في اليوم
بلاش خالص خالص مياه غازية ولا وجبات سريعة من الشارع
تاكل اكل صحي فقط في 8 ساعات
لو عملت كده هتلاحظ فرق كبير بعد اسبوعين اتنين والفرق ده هيشجعك تكمل لحد ما توصل للمستوي اللي انت عايزه من جسمك .
وشكرا انك وصلت لهنا وكملت الموضوع للأخر ، اتمني الكلام اللي فوق ده يفيدك وتوصل لهدفك .
Be Strong