حابب اتكلم في موضوع مهم جداً وهتكلم بالعامية عشان أقدر أوصل المعلومات بطريقة أسهل لكل الناس، وبصراحة الموضوع دا شاغل بال ناس كتير وللاسف مش عارفين يعملوا ايه عشان يساعدوا نفسهم في مصاريف الكلية أو الدراسة ويبطلوا يعتمدوا علي الأهالي شوية.
ازاي وليه لازم تشتغل اون لاين
مفيش شك ان احنا في عصر التقنية سيطرت علي كل حاجة فيه، لدرجة ان المحلات بقت اونلاين لأ وبتكسب أكتر لو انت اجتهدت عن اللي فاتح محل بيبيع فيه اي حاجة.
مشروع بيع الملابس اونلاين
وهنا هاخدك لأول مشروع ممكن تلاقي نفسك فيه.. فكرت قبل كدا تبيع أي منتج بتحبه، وليكن مثلا تيشرتات سواء رياضية أو مطبوعة، ....
الموضوع سهل جدا، افتح صفحة علي فيسبوك وظبطها معلوماتها كويس، بس أهم نقطة في الموضوع كله هي نقطة التسويق للصفحة كويس، وهنا برشحلك تاخد كورس جوجل المجاني عن الديجيتال ماركتينج، هيفتح مخك في التسويق وهتعرف حاجات مهمة كتير هتساعدك وكمان الكورس بشهادة معتمدة من جوجل هتتبعتلك علي الايميل لما تخلصه، ده رابط الكورس لما تخلص الموضوع بص عليه بصة، وهسيبهولك في الأخر بردو.
افتح قناة يوتيوب
تاني حاجة برشحهالك انك تفتح قناة يوتيوب وتقدم فيها معلومات تكون بتفهم فيها ومش شرط يكون عندك جهاز كمبيوتر ولا يكون عندك كاميرا، فيه برامج مونتاج كتير موجودة علي الموبايل + تصوير بكاميرا الموبايل بقي وافي جدا وتقدر تسجل بموبايلك لحد جودة 1080 مستريح.
طيب ايه الأفكار اللي اعمل عنها فيديوهات ؟
بص انت ممكن تصور اي حاجة عندك وتعملها ريفيو، هات كتب اعملها ريفيو ومتصورش وشك حتي صور الكتاب بس وانت بتتكلم، الفيزا بتاعتك ممكن تعرف شوية معلومات عنها وتعمل عنها ريفيو وانت بتصورها وأنا اضمنلك ان كل الحاجات دي عليها عمليات بحث والفيديو بتاعك هيتشاف، وغيرهم الكتير والكتير بس انت خلي طريقتك مميزة في الكلام وظبط الصوت أهم حاجة وهتعمل فيديو كويس.
اعمل موقع الكتروني علي منصة بلوجر
انت ممكن تمتلك موقع الكتروني خاص بيك في دقائق معدودة وتكسب من عرض اعلانات جوجل علي المقالات اللي نشرتها علي الموقع، بس الخطوة دي مرهقة سيكا وكمان هتحتاج تصرف شوية في الأول (مش كتير يعني في حدود 200 جنيه هتصرفهم علي قالب الموقع والدومين المدفوع اللي هتشتريه)
لو عايز تعرف أكتر عن الموضوع ده في مقالة علي موقعنا بتتكلم عنه بالتفصيل دوس هنا عشان تقرأ الموضوع، أو ممكن تدخل اليوتيوب هتلاقي ناس كتير جدا بتتكلم عن بلوجر والربح من بلوجر، كل اللي عليك اكتب في خانة البحث كلمة جوجل بلوجر فقط وخد فكرة عامة عن الموضوع.
ادخل عالم الفريلانسج
الفريلانسج باختصار هو العمل الحر علي مواقع العمل الحر زي موقع Freelancer و UpWork وفيه مواقع عربية زي خمسات ومستقل، فكرة العمل باختصار انك عندك مهارة معينة وبتتقنها زي الترجمة للانجليزية علي سبيل المثال أو المونتاج أو التصميم وهكذا.
بتبدأ تعمل حساب علي المواقع دي وتعرض شغلك اللي انت بتتقنه، بس خد بالك ان هتلاقي ليك منافسين كتير فلازم تكون مميز بحق وتظبط الأكونت بتاعك كويس ومع الوقت هيبتدي يجيلك ناس تشتري الخدمة بتاعتك وتنفذها وتكسب حسب المبلغ اللي انت حددته وانت بتقدم الخدمة علي الموقع.
بشكل كبير دي المشاريع اللي انت ممكن تنجح فيها بجانب دراستك، بالطبع فيه حاجات تانية كتير بس هتاخد من وقتك وجهدك كتير، علي سبيل المثال زي انك تعمل موقع الكتروني وتتعلم سيو، انت ممكن تعمل كده طبعا بس الموضوع حقيقي مرهق وهياخد من وقتك وجهدك ولازم تصرف عليه كمان.
مشروع بديل
لو انت ليك شغف في الموسيقي أو الأفلام أو أي موضوع اخر ممكن تعمل صفحة علي فيسبوك وانستجرام وتويتر ويكونوا كلهم تحت اسم واحد ويوزرنيم واحد زي صفحة سكرين ميكس علي سبيل المثال.. هنا انت هتقدم محتوي علي السوشيال ميديا ويجيلك متابعين لو طبعاً قدمت محتوي مميز ومحبوب، وساعتها ممكن تستغل شهرة صفحاتك وتعمل اعلانات عليها، من نفس حساب الفريلانسرهتقدم خدمة تسويق الكتروني علي صفحة ما من صفحاتك علي السوشيال ميديا وهتلاقي ناس كتيرحابة تعلن عندك.