ملخص السيزون الأول من مسلسل Rivo
كتير مننا اتفرج علي مسلسل ريڤو سنة اصداره السنة اللي فاتت ٢٠٢٢ ونسي أحداثه أو مش فاكر منه كتير الا لو شافه مرة كمان السنادي او نهاية السنة اللي فاتت.
في الموضوع ده هنراجع سوا ملخص وقصة الجزء الأول من مسلسل ريڤو عشان تدخل الجزء الثاني ملم بالأحداث، بالظبط كأنها مراجعة ليلة الامتحان.
Rivo
ابتدت أحداث مسلسل ريڤو الجزء الأول بموت المخرج والمؤلف حسن فخر الدين، بنته مريم اتأثرت وقررت تكمل اللي والدها حسن ماكملوش قبل مايتوفي.
مريم اكتشفت ان حسن كان بيكتب سيناريو لفيلم جديد اسمه ريڤو
طب مين هما ريڤو وايه قصتهم وليه باباها كان عاوز يعمل عنهم فيلم، ده اللي هنعرفه.
مريم مبدأياً كده عرفت ان ريڤو ده باند موسيقي كان موجود في التسعينات.
مكانتش بتنام عشان تلاقي معلومة او أي حاجة عن ريڤو لحد ما مرة لقت بوستر للباند موجود في استور علي الانترنت
فاخدت بعضها وراحت للاستور هي وصاحبتها عشان تجيب بس البوستر لعله يكون انفراجة تعرف من خلاله أكتر عن الفيلم.
وبالفعل مريم وصاحبتها وصلوا للاستور واشتروا البوستر ومن اللحظة دي مريم بدأت تعرف حاجات أكتر عن ريڤو واللي ساعدها في ده صاحب الاستور نفسه هو وصاحبه لأنهم كانوا مهتمين بالمزيكا والباندات اللي كانت موجودة زمان في مصر.
لحد دلوقتي والدنيا تمام مع مريم، لكن علي جانب تاني كان فيه منتج اسمه سامح، كان مهتم جداً يعرف ايه موضوع اخر افلام حسن فخر الدين قبل مايموت.
وسامح كان له صلة بصاحبة مريم فساومها بغرض انها تجيبله السيناريو من مريم وده اللي حصل، صاحبة مريم خانتها وادت السيناريو لسامح.
فلاش باك
فلاش باك بقي للتسعينات نعرف شوية عن ريڤو وبدايتهم، باند ريڤو كان مكون من 5 أشخاص: شادي، مروان، ماجد، نعمان وأباظة
البداية كلها كانت من عند شادي، الشاب الطموح اللي نفسه مزيكته وصوته يلفوا مصر كلها، كان نفسه يعمل حاجة ويبقي إنسان مؤثر من خلال الفن والمزيكا.
عكس اصحابه اللي منهم كان همه حفلة كل خميس ويكسب من وراها فلوس، واللي منهم كان عايز بس يلعب مزيكا يضيع وقته فيها وبس.
لكن شادي كان مختلف، كان طموح وعنده نظرة لقدام.
شادي وماجد ونعمان التلاتة كانوا اصحاب في البداية واتعرفوا علي مروان ومدحت أباظة بعد كده.
الخمسة بدأوا يلعبوا في النادي لكن ده معجبش باند تاني كان اسمه أستك باند بقيادة أدهم السلكاوي
أدهم كان في عداوة دائمة مع شادي بسبب ياسمين من ناحية والباند والمزيكا من ناحية.
طب مين هي ياسمين
ياسمين كانت بنت مسؤول في النادي اللي هما بيلعبوا فيه وكانت بتحب شادي زمان وأدهم كان بيحبها، و ده سبب الصراع بين شادي وأدهم أغلب الوقت.
طب شادي وريڤو يعملوا ايه علشان يبعدوا عنهم المشاكل؟
سابوا النادي خالص وبقوا يلعبوا مزيكتهم في مكان اسمه الروف بيقدم اكل وشرب وهما كانوا بيلعبوا مزيكا علي جنب.
لكن علشان شادي ديماً مبيحبش يكون في الضل اشتكي لأصحابه وصاحب المكان ان الوضع ده ميناسبش طموحه وانه عايز يكون متشاف أكتر
لما حكي لياسمين (اللي هي كانت شاطرة جدا في الماركتينج) اقترحت علي صاحب المكان ان بدل ما المكان بيقدم اكل وشرب والمزيكا علي جنب، لا المزيكا هي الحاجة الرئيسية في المكان والأكل والشرب هما اللي يكونوا علي جنب.
اقتراح ياسمين كان هايل وريڤو اتعرفوا أكتر وأكتر.
نرجع لمريم
مريم كانت في صراع مع سامح اللي مصمم هو اللي يعمل الفيلم وكانت في صراع أيضاً مع خطيبها اللي عايز ياخدها ويسافر كندا وصراع مع صاحبتها اللي خانتها وصراع مع دوامة ريڤو وليه والدها حسن فخر الدين كان مصمم يعمل فيلم عن ريڤو دول!
لم الشمل
بالطبع أعضاء فرقة ريڤو عرفوا ان فيه فيلم بيتعمل عنهم، لكن هما مكانوش مع بعض
ماجد كان موجود في فرنسا ومستقر هناك وأباظة كان قرر ينسي الماضي وبقي مؤذن في المسجد ونعمان اتجوز يارا رحمي اخت ياسمين، وياسمين اتجوزت أدهم! وطبعا مروان كان بيتعالج نفسيا في مصحة.
لما كل دول عرفوا موضوع فيلم ريڤو منهم اللي كان موافق علي الفيلم ومنهم اللي رفض.
اللي رفضوا في البداية كان ياسمين وأدهم ونعمان، ورفضهم كان عشان البيزنس بتاعهم وحياتهم متتهدش بمجرد ان الناس تعرف ماضيهم!
اللي كان موافق علي فكرة الفيلم كان مروان وماجد وأباظة
ولما اجتمعوا في الأخر وانضم ليهم نعمان وافق هو كمان علي فكرة الفيلم
أين شادي؟
اللي عرفناه في الجزء الأول عن شادي انه توفي في حادثة زمان، وده كان السبب الرئيسي ان حسن يكتب عن شادي وريڤو وأصحابه يوافقوا هما كمان علي فكرة الفيلم، كل ده علشان يقدموا شادي للعالم والكل يعرف أكتر عن شادي.
علاقة شادي بحسن وبمريم
اكتشفت مريم في الاخر ان حسن والدها اتجوز والدة شادي، ولكن شادي اسمه شادي أشرف مش شادي حسن، بالتالي شادي ليس ابن حسن فخر الدين وليس أخ لمريم!
لكن في نهاية السيزون الأول وعندما كانت مريم تتجول في المصحة، عندها عرفها مروان علي ليلي والدة شادي
ليلي تعاني من الزهايمر، لكن عند حديثها مع مريم تذكرتها وقالت لها انتي مريم، وهنا كانت صدمة مريم عندما قالت لها ليلي أن شادي ليس ابن حسن، لكن هي وحسن تزوجوا وانجبوا بنت!
هنا انتهت أحداث الموسم الأول من مسلسل ريڤو.
من المحتمل أن تكون مريم أخت شادي من الأم ليلي، هذا ماسنتعرف عليه في الموسم الثاني، الذي سيعرض يوم ٢١ يونيو المقبل علي منصة Watchit.
كما وسنعرف أيضا الكثير عن حياة شادي وكيف توفي وعلاقته بحسن ستتضح أكثر، وهل فيلم ريڤو سيري النور؟
نترككم مع تريلر الموسم الثاني من ريڤو