التايم لاين المصري والعربي من امبارح بنشوف فيه كلمة كامافينجا كتير
وتحديدا بوست محتواه الاتي:
نفسي يدخل كاماڤينجا
ونروح انا وكاماڤينجا
فبيتسائل البعض طبعا عن معني التريند او معني البوست
وفي الموضوع ده هنوضح يعني ايه تريند كامافينجا اللي انتشر فجأة ومين هو كامافينجا أصلا!
كامافينجا لاعب فرنسي في صفوف فريق ريال مدريد الاسباني
الشهر اللي فات كان فريق ريال مدريد ييلاعب بايرن ميونيخ في دوري أبطال أوروبا
ريال مدريد كانت احواله في المباراة جيدة لحد ما المدرب نزل اللاعب كامافينجا ومن هنا انقلبت المباراة رأسا علي عقب، كامافينجا اخد كارت احمر والريال خسر و ودع البطولة.
طب ايه علاقة ده بالتريند المنتشر؟
عصام الشوالي معلق المباراة قال جملتين بعد طرد كامافينجا
قال بالنص:
الأمور كانت ماشية
الأمور هانية
الأمور 10/10
قله مخه دخل كامافينجا
دخل كامافينجا
روح هو وكامافينجا
هنا بعض مستخدمين مواقع الانستجرام والتيك توك حولوا كلام المعلق عصام الشوالي لساوند متداول بينهم وضافوا من خلاله قصص طريفة من حياتهم الشخصية
يعني مثلا فيه حد استخدم الساوند وقسم الفيديو مقطعين
مقطع للمعلق عصام الشوالي لحد قبل جملة الأمور 10/10
وفيه بيضيف المستخدم لمحات من حياته وكل شئ علي ما يرام
بس لما عصام الشوالي بيقول "قاله مخه دخل كامفينجا"
هنا المستخدم بيضيف لمحات اتغيرت فيها حياته الشخصية 180 درجة بأسلوب فكاهي وطريف
علي سبيل المثال
مستخدم قام بنشر صور ايام العزوبية وعصام الشوالي يقول الأمور كانت ماشية الأمور هانية..
فجأة عصام الشوالي بيقول "قاله مخه دخل كامافينجا"، المستخدم هنا اضاف صور من حفل زفافه في اشارة منه ان زواجه اشبه بدخول كامافينجا وروح هو وكامافينجا بعد نهاية حفل الزفاف،
عشان كده بنلاقي النهاردة بوست منتشر علي فيسبوك بيقول
"نفسي يدخل كاماڤينجا
ونروح انا وكاماڤينجا"
اللي بيشير البوست هنا بيكون غرضه تمني الزواج في اقرب فرصة.
دي كانت قصة كامافينجا المنتشرة علي التايم لاين.